२४ मंसिर २०७८,
काठमाडौ । नेपाल तामाङ कलाकार संघको आयोजनामा ‘दोस्रो तामाङ मौलिक सेलो संगीत महोत्सव २०७८’ को पहिलो दिनको कार्यक्रम भव्यताको साथ सम्पन्न भएको छ ।
शुक्रवार काठमाडौ बौद्ध चुच्चेपाटी स्थित होटल हायतको खुल्ला मैदानमा महोत्सवको पहिलो दिनको कार्यक्रम सम्पन्न भएको हो । विभिन्न तामाङ मौलिक बाध्यवादन सहितको र्यालीबाट शुरु भएको पहिलो दिनको कार्यक्रम विबिध सांस्कृतिक कार्यक्रम सहित सम्पन्न भएको छ । तामाङ मौलिक बाजा डम्फु सहितको र्यालीमा अन्य विभिन्न बाध्यवादन सहितको नाचगान समेत रहेका थिए । तामाङ कलाकार, पत्रकार, गान्वा, ताम्बा, बोन्बो, लामा सहित अन्य विभिन्न ठाउंबाट महोत्सव सफल पार्न आएका तामाङहरु बौद्ध परिसरमा जम्मा भएका थिए । विभिन्न तामाङ संघसंस्थाहरुको व्यानर सहितको र्याली बौद्ध परिसर हुंदै कार्यक्रमस्थलमा पुगेका थिए ।
महोत्सवको पहिलो दिनको उद्घाटन समारोह कार्यक्रम पर्यटन, सस्कृति तथा नागरिक उड्यन मन्त्री प्रेम आले मगरद्धारा तामाङ मौलिक बाजा डम्फु बजाएर समुद्घाटन गरेका थिए । कार्यक्रममा अतिथिका रुपमा बागमती प्रदेशका उपसभामुख राधीका तामाङ, अन्तराष्ट्रिय तामाङ परिषदका उपाध्यक्ष टासी लामा लगायत अन्य विभिन्न संघसंस्थाका प्रतिनिधिहरु रहेका थिए ।
औपचारीक कार्यक्रम सम्पन्न भए पश्चात रातको ८ बजे सम्म विबिध सांस्कृतिक कार्यक्रम सहित पहिलो दिनको कार्यक्रम सम्पन्न भएको हो । महोत्सवको दोस्रो दिनको कार्यक्रम भने भोलि बिहान ११ बजे देखि रातको ८ बजे सम्म रहने र भोलि हुने दोस्रो दिनको कार्यक्रममा तामाङ मौलिक गीत फापरे सेलो, खान्दोके, म्हेन्दोमाया, लगायत ताम्बा गान्बा र नव कलाकारहरुको प्रस्तुती रहने कार्यक्रम आयोजक टिमले जानकारी दिएको छ ।
‘सम्पुर्ण तामाङ कलकाहरुको एकता, तामाङ कला संस्कृतिको संरक्षण तथा प्रवद्र्धन हाम्रो प्रतिवद्धता’ भन्ने मुल नाराका साथ सञ्चाल गरेको महोत्सव भोलि पुर्ण रुपमा सम्पन्न हुनेछ ।
